မှတ်ဥာဏ်နည်းတဲ့ လူလိမ်များ…..
(၁)
၁၉၈၈ ခုနှစ် စက်တင်ဘာလ (၁၈) ရက်နေ့က စပြီး အာဏာသိမ်းယူခဲ့တဲ့စစ်အုပ်စုဟာ ၂၀၀၇ ခုနှစ် စက်တင်ဘာလ (၁၈) ရက်နေ့ဆိုရင် အာဏာသိမ်းသက်တမ်း (၁၉) နှစ်ရှိသွားပြီ။
ဒီ (၁၉) နှစ်အတွင်းမှာ စစ်အုပ်စုဘာတွေလုပ်ခဲ့လဲ။
ဗုဒ္ဓဘာသာရဲ့ အဆုံးအမအရ ကြည့်ရင် ဒီ (၁၉) နှစ်အတွင်းမှာ စစ်အုပ်စုဟာ “ကံငါးပါး” လုံးကို ကျူးလွန်ခဲ့တယ်။ ပြောရရင်တော့ စစ်အုပ်စုဟာ ငါးပါးသီလကို မစောင့်ထိန်းခဲ့ဘူး။ သီလငါးပါးလုံး ကျိုးခဲ့တဲ့ ဗုဒ္ဓဘာသာပျက်တွေလို့ ဆိုရမှာပဲဖြစ်တယ်။ ဒါဟာ လောကီလူ့အဖွဲ့အစည်းအတွင်းမှာလည်း ဆင်းရဲဒုက္ခမျိုးစုံကိုဖြစ်စေခဲ့သလို သံသရာ မှာလည်း စစ်ဗိုလ်ချုပ်ကြီးများအတွက်က ကြောက်ရွံ့စိုး ထိတ်စရာပါပဲ။
ငါးပါးသီလထဲမှာ …
သူ့အသက်ကို သတ်လား စစ်အုပ်စုက မရှောင်ကြဉ်။ သတ်ပါတယ်။
သူများသားမယားအပေါ် ကာမဖောက်ပြန်ကျူးလွန်သလား တပ်မတော်သားများ မငြင်းနိုင်။ စစ်ကြောင်းများက တိုင်းရင်းသူ ပျိုပျိုအိုအို အားလုံးအား အဓမ္မလိင်ဆက်ဆံကြပါတယ်။
သူတပါး ပစ္စည်းအား သဘောမတူ မကြည်ဖြူပါပဲ ခိုးဝှက်လုယူပါသလား မေးမနေနဲ့။ မြေယာဧက ထောင်သောင်း တို့အား လယ်သမားများထံက အဓမ္မလုယူပါတယ်။
အရက်သေစာ ဘိန်းဘင်းကဇော်ကိစ္စကတော့ ပြောမနေပါနဲ့တာ့။
နောက်ဆုံး တပါးသော သီလကရော။ “မုသား”။
ဘယ်လိုပါလဲ ။
“ခုလို လွတ်လပ်ပြီး တရားမျှတမှုရှိတဲ့ ပါတီစုံအထွေထွေရွေးကောက်ပွဲကြီးကို အောင်အောင်မြင်မြင် ကျင်းပပေးခဲ့တာဟာ န၀တအနေနဲ့ အာဏာလွှဲပြောင်းပေးချင်လို့ပဲ လုပ်ပေးခဲ့ခြင်းဖြစ်ပါတယ်။ အာဏာလွှဲပေးဖို့ ဆန္ဒမရှိဘူး၊ နိုင်ငံတော်အာဏာကို ရာသက်ပန်ဆုပ်ကိုင်ထားလိုတယ်ဆိုရင် ပြည်သူ့ လွှတ်တော် ရွေးကောက်ပွဲကြီးကို လုပ်ပေးစရာအကြောင်းမရှိပါဘူး။ နိုင်ငံတော်အာဏာကို လွှဲပြောင်း ပေးဖို့ မူလကတည်းက ဆန္ဒရှိလို့သာ ရွေးကောက်ပွဲကြီးကို ပြုလုပ်ပေးခဲ့တာ ဖြစ်တယ်”
စစ်အုပ်စုရဲ့အတွင်းရေးမှူး (၁) ဖြစ်တဲ့သူက အဲ့ဒီလို တမျိုး။
“… တပ်မတော်သားများနဲ့ ဖွဲ့စည်းထားတဲ့ ကျနော်တို့ အဖွဲ့အစည်းအနေနဲ့လည်း နိုင်ငံကျေးဇူးသစ္စာကို ခံယူထားတဲ့ အဖွဲ့အစည်းဖြစ်ဖို့ နိုင်ငံတော်နဲ့ နိုင်ငံသားတွေအပေါ် ၀န်ခံထားရှိပြီးဖြစ်တဲ့ကတိသစ္စာကို ဘယ်လိုအကြောင်းကြောင်းနဲ့မျှ ပယ်ဖျက်ဖောက်ဖျက်မှာ မဟုတ်ကြောင်းကို ယုံကြည်ထားရှိကြစေ လိုတယ် …” အာဏာသိမ်းစစ်ခေါင်းဆောင် ဗိုလ်ချုပ်မှူးကြီးကလည်း အာဏာသိမ်းပြီး (၅) ရက် အကြာမှာ တိုင်းပြည်ကို အထပ်ထပ်ကတိတွေ ပေးခဲ့ပြန်ပါတယ်။ ဒါတွေက လွန်ခဲ့တဲ့ (၁၉) နှစ်ကပါ။ (၁၉) နှစ်ကြာခဲ့ပါပြီ။ စစ်အုပ်စုကတော့ “မုသား” အဖြစ်နဲ့ ငါးပါးရဲ့သီလတပါးကို ကျူးလွန်ဖြစ်ခဲ့ပါ တယ်။
(၂)
“… ကျနော်တို့ အာဏာကို ဥပဒေနဲ့အညီလွှဲမယ် (Majority Vote Government Form Up ) လုပ်နိုင်ရင် လွှဲပေါ့ဗျာ။ ကျနော်တို့ သဘောတူပါတယ် …”
သွားလေသူ အာဏာသိမ်းခေါင်းဆောင်ဗိုလ်ချုပ်မှူးကြီး ပြောခဲ့တဲ့စကားပါ။ ၁၉၉၀ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲ မကျင်းပခင် ၁၉၈၉ ခုနှစ် ဇူလိုင်လ (၅) ရက်က ပြောခဲ့တဲ့ စကားပါ။ စစ်ကောင်စီရဲ့ ဥက္ကဋ္ဌ တယောက်ဖြစ်တဲ့အတွက် စစ်အုပ်စုကို ကိုယ်စားပြုသလို တပ်မတော်ရဲ့ကာကွယ်ရေးဦးစီးချုပ် ဖြစ်နေတဲ့အတွက်လည်း တပ်မတော်ကို ကိုယ်စားပြုပါတယ်။
၁၉၉၀ ပြည့်နှစ် ရွေးကောက်ပွဲကြီးကတော့ နိုင်ငံသမိုင်းမှာ ထူးခြားလွန်းပါတယ်။ မြန်မာနိုင်ငံ ရွေးကောက်ပွဲ သမိုင်းအရကြည့်ရင် ၁၉၄၆-၄၇ တိုင်းပြုပြည်ပြု လွှတ်တော်ရွေးကောက်ပွဲပြီးရင် (၉၀) ခုနှစ် ရွေးကောက်ပွဲဟာ လူထုရဲ့ရင်ဘတ်ထဲက ဆန္ဒကို အပြည့်အ၀ထုတ်ဖော်ပြသခဲ့တဲ့ ရွေးကောက် ပွဲလို့ ဆိုရမှာပါ။ အမျိုးသား ဒီမိုကရေစီအဖွဲ့ချုပ်ဟာ ပြည်သူလူထုရဲ့ ထောက်ခံဆန္ဒပြုမှုနဲ့ မဲဆန္ဒ နယ်မြေ (၃၉၂) နေရာမှာ အနိုင်ရရှိခဲ့ပါတယ်။ မဲဆန္ဒနယ်မြေ (၄၈၅) နေရာက (၃၉၂) နေရာ အနိုင်ရခြင်းပါ။ ရာခိုင်နှုန်းအရ (၈၂) ရာခိုင်နှုန်းရှိပါတယ်။ ဆန္ဒမဲ ဆယ့်သုံးသန်းထဲက ကိုးသန်းသော နှလုံးသားတို့ ဆန္ဒပြုခဲ့ကြခြင်းပါ။
မဆလတဖြစ်လဲ တိုင်းရင်းသားစည်းလုံးညီညွတ်ရေးပါတီလို့ခေါ်တဲ့ (တ.စ.ည) က မဲဆန္ဒနယ်မြေ (၁၀) ခုမှာ အရွေးခံရပါတယ်။ (၄၈၅) ထဲက (၁၀) နေရာပါ။ (၂၆) နှစ်လုံးလုံး တိုင်းပြည်ကို စိုးမိုး ထားတဲ့ ပါတီကြီးတခုက လူထုရဲ့ခုံရုံးပေါ်လည်း မှတ်ကျောက်တင်ကြည့် အဖြေက ရှင်းရှင်းကြီး ပေါ်လာပါတယ်။ လူထုရဲ့ မေလ နှလုံးခုန်သံက စစ်အုပ်စုကို ဇောချွေးပြန်စေခဲ့ပါတယ်။ လူထု
သဘောထားဟာ စစ်အုပ်စုအတွက် ရင်ဆိုင်ရန် မ၀ံ့တဲ့ စိန်ခေါ်မှုကြီးဖြစ်လာပါတော့တယ်။
လူထုသဘောထားက ရှင်းပါတယ်။ မည်သို့သော အာဏာရှင်မျိုးကိုမဆို အနှောင်အဖွဲ့ ကင်းကင်းနဲ့ သံယောဇဉ် ပြတ်ခဲ့ပြီ ဆိုတာပါပဲ။ လူထုရဲ့တူရှုချက်က ဒီမိုကရက်တစ်လူ့ဘောင်သစ်။ လူထုရဲ့ တိမ်းညွှတ်မှုက လူ့အခွင့်အရေး ပြည့်ဝတဲ့ လူ့အဖွဲ့အစည်းသစ်။ လူထုရဲ့လားရာက အမျိုးသား သွေးစည်းညီညွှတ်မှုရှိသည့် ငြိမ်းချမ်းသာယာသော ပြည်ထောင်စုသစ်။
မေ (၂၇) နှလုံးခုန်သံအား စစ်အုပ်စုတို့ ကြားရပြီ။ ဘာလုပ်မလဲ။ စစ်အုပ်စု စကားတမျိုးပြောင်းပြီ။ ရွေးကောက်ပွဲလွန် စစ်အုပ်စုရဲ့အချိုးက ခေတ်စကားအရပြောရင် “ မမိုက်တော့”။ ပါတီစုံဒီမိုကရေစီ အထွေထွေရွေးကောက်ပွဲ ကျင်းပပြီးတဲ့နောက် ရက်ပေါင်း (၆၀) ပြည့်ပြီးတဲ့အခါမှာ အဖွဲ့ချုပ်က အစည်းအဝေးတခုပြုလုပ်ပါတယ်။ ရန်ကုန်မြို့ ဂန္ဒီခန်းမမှာပါ။ ရွေးချယ်ခြင်းခံရတဲ့ အဖွဲ့ချုပ်လွှတ်တော် ကိုယ်စားလှယ်တွေ အားလုံးတတ်ရောက်ကြပါတယ်။ ပြည်သူ့လွှတ်တော်အစည်းအဝေးလို့ ဆိုရမှာပါ။ လွှတ်တော်ကိုယ်စားလှယ် (၈၀%) ကျော် အစည်းအဝေးပါ။ ပြည်သူကို (၈၀%) ကျော် ကိုယ်စားပြုတဲ့ အစည်းဝေးပါ။ အဓိက ဆွေးနွေးဆုံးဖြတ်တာတွေက ပြည်သူ့လွှတ်တော် ရွေးကောက်ပွဲ ဥပဒေ အခန်း (၁) ပုဒ်မ ၂(က) နဲ့ အခန်း (၂) ပုဒ်မ (၃) တို့အရ “ပြည်သူ့လွှတ်တော်ကို ဖွဲ့စည်းပေးဖို့၊ လွှတ်တော် ဆိုရာမှာလည်း ဥပဒေပြုလွှတ်တော် (တိုင်းပြုပြည်ပြုလွှတ်တော်) မဟုတ်ဘူး။ ပြည်သူ့လွှတ်တော်ဖြစ် တယ်” အခုရွေးကောက်ပွဲပြီးတာ ရက်ပေါင်း (၆၀) ကျော်ပြီးဖြစ်တယ်။ ဒီအတွက် ပြည်သူ့ကိုယ်စား လှယ်များနဲ့ ပြည်သူ့လွှတ်တော်ကို ဖွဲ့စည်းသွားရန် အဖွဲ့ချုပ်က ကြိုးပမ်းလုပ်ဆောင်သွားမယ်။ န၀တ စစ်အုပ်စုနဲ့လည်း တွေ့ဆုံဆွေးနွေးမယ်။
နောက်တချက်က ဥပဒေနဲ့အညီ အာဏာလွှဲပြောင်းဖို့။ အင်အယ်လ်ဒီက ရေးဆွဲထားတဲ့ “၁၉၉၀ ပြည့်နှစ် ယာယီဖွဲ့စည်းအုပ်ချုပ်ပုံအခြေခံဥပဒေ (မူကြမ်း )” ရှိတယ်။ ဥပဒေ မူကြမ်းနဲ့ ပတ်သက်ပြီး တော့လည်း အခြားအင်အားစုအသီးသီးနဲ့ ညှိုနှိုင်းဆောင်ရွက်မယ်။ ပြင်စရာရှိ ပြင်မယ်။ ဖြည့်စွက်စရာ
ရှိ ဖြည့်စွက်မယ်။ ပြီးရင် လွှတ်တော်ခေါ်ယူဖွဲ့စည်းပြီး လွှတ်တော်ရဲ့အတည်ပြုချက်နဲ့ ဥပဒေနဲ့အညီ စစ်အုပ်စုထံက အာဏာလွှဲပြောင်းရေး ကိုပြုလုပ်သွားမယ်။
ဒါက အင်အယ်လ်ဒီ ဗဟိုခေါင်းဆောင်တွေနဲ့ အင်အယ်လ်ဒီပြည်သူ့လွှတ်တော်ကိုယ်စားလှယ်တွေ တွေ့ဆုံဆွေးနွေးခဲ့တဲ့ ဂန္ဒီအစည်းအဝေးရဲ့သဘောတူညီချက်တွေ။ ပြီးတော့ ဂန္ဒီခန်းမရဲ့သဘောထား ရှေ့လုပ်ငန်းစဉ် အစီအစဉ်တွေကလည်း တသီးတခြား တဖက်သတ်။ စဉ်းစားချက်တွေမဟုတ်ပါဘူး။ ရွေးကောက်ပွဲမတိုင်မီ စစ်အုပ်စုရဲ့ခေါင်းဆောင်ကြီးတွေ ပြောဆိုခဲ့တဲ့မိန့်ခွန်း။ ကျင်းပခဲ့တဲ့ သတင်းစာ ရှင်းလင်းပွဲ။ ထုတ်ပြန်ခဲ့တဲ့ ထုတ်ပြန်ကြေညာချက်နဲ့ ဥပဒေတွေမှ ပြောဆိုပါရှိခဲ့တဲ့ ကတိက၀တ် သဘောထားတွေကို အခြေခံပြီး ဂန္ဒီမှာ စဉ်းစားချမှတ်ခဲ့ကြတာပါ။
“… ကျနော်တို့ (န၀တ) ဥက္ကဋ္ဌ ဗိုလ်ချုပ်မှူးကြီးစောမောင်က အတိအလင်းပြောပြီးပါပြီ။ န၀တအနေနဲ့ နိုင်ငံတော် ဖွဲ့စည်းပုံအခြေခံဥပဒေကို မရေးဘူး။ ပြည်သူ့ကိုယ်စားလှယ်တွေက ရေးဖို့ဖြစ်တယ်။ ဒီလို တိတိလင်းလင်း ပြောခဲ့တဲ့အတိုင်း အခု ရွေးကောက်တင်မြှောက်ခံရတဲ့ နိုင်ငံရေးပါတီအသီးသီးက ပြည်သူ့ကိုယ်စားလှယ်တွေနဲ့ တကွ အဓိက နိုင်ငံရေးပါတီက ဒီကိစ္စကို ဦးစီးဦးဆောင်ပြုရမှာပဲ …”
(၁၀၄) ကြိမ်မြောက် သတင်းစာရှင်းလင်းပွဲမှာ စစ်အုပ်စုရဲ့အတွင်းရေးမှူး (၁) က တိုင်းပြည်ကို ပြောခဲ့ တာပါ။ နောက်ပြီး ၁၉၈၉ ဇူလိုင်လ (၅) ရက်နေ့မှာလည်း ဗိုလ်ချုပ်မှူးကြီးစောမောင်က အင်္ဂလိပ်လို တွေနဲ့ ညှပ်ပြီး တိုင်းပြည်ကို ပြောခဲ့ပါသေးတယ်။
“ (Constitution) အသစ်ဆွဲချင်သလား။ ဆွဲလို့ ကျနော်တို့ပြောတယ်။ ဘယ် (Constitution) ယူမလဲ။ ဘယ်ဟာကို (Recognize) လုပ်မလဲ။ (Amendment) လုပ်မလား။ ဒါတွေက ပါတီတွေစဉ်းစားရမယ့် ကိစ္စဗျ…”။
ရွေးကောက်ပွဲပြီးလို့ ရက်ပေါင်း (၆၀) တိတိပြည့်တဲ့နောက်မှာ စစ်အုပ်စုက ကြေညာချက်တစောင် ထုတ်ပြန်ခဲ့တယ်။ ၁၉၉၀ ခုနှစ် ဇူလိုင်လ (၂၇) ရက်နေ့ နေ့စွဲနဲ့ပါ။ ဂန္ဒီအစည်းအဝေးမတိုင်မီ တရက် အလိုမှာပါ။ ၁/၉၀ လို့ခေါ်ပါတယ်။ ဂန္ဒီအစည်းအဝေးထက် တရက်စောပြီး ကြိုထုတ်တဲ့ စစ်အုပ်စုရဲ့ ကြေညာချက်ပါ။ စစ်ရေးအရ ပြောရရင်တော့ ဂန္ဒီကိုဖျက်ပြီး ချုံခိုတိုက်တဲ့ပွဲပါ။
၁/၉၀ ရဲ့အနှစ်ကတော့ (Recognize) တွေ (Amendment ) လုပ်ပြီး ယာယီဖွဲ့စည်းပုံရေးဆွဲတာကို လက်မခံနိုင်ဘူး။ လုပ်ရင် အရေးယူမယ်။ ဖမ်းမယ်။ ဒါပါပဲ။
စစ်အုပ်စုကတော့ စကားပုံအသစ်တွေ ထွင်နေတယ်။
“ပါးစပ်ကပြော …..ခြေနဲ့ဖျက်”
(၃)
ဗိုလ်ချုပ်မှူးကြီးစောမောင်ကို စစ်အုပ်စုရဲ့အတွင်းက ဖယ်ရှားလိုက်ရတဲ့ အကြောင်းများစွာထဲမှာ
“ဘယ် (Constitution) ယူမလဲ။”
“ဘယ်ဟာကို (Recognize) လုပ်မလဲ။”
“(Amendment ) လုပ်မလား။” ဆိုတဲ့ စကားကြီးသုံးခွန်းဟာလည်း အရေးပါတဲ့အကြောင်းတခုဖြစ်ခဲ့တယ် ဆိုရမှာပါ။
ဗိုလ်ချုပ်မှူးကြီးကို စစ်အုပ်စုရဲ့အာဏာအ၀န်းအ၀ိုင်းထဲက ဆွဲထုတ်ခဲ့ကြပေမယ့် ကျန်ရစ်သူစစ်အုပ်စု ကတော့ ဖွဲ့စည်းပုံအခြေခံဥပဒေရေးဆွဲရေးနဲ့ ပတ်သက်ပြီး ပြည်သူ့လွှတ်တော်ကိုယ်စားလှယ်တွေ မှာလည်း တာဝန်ရှိတယ်ဆိုတာကိုတော့ ပြောင်ပြောင်တင်းတင်း မချိုးဖောက်မိသေးပါဘူး။
ဒါကြောင့်ပဲ ကြေညာချက် ၁/၉၀ ရဲ့ အပိုဒ် (၁၂) နှင့် (၂၀) မှာ … “ပြည်သူ့လွှတ်တော်ရွေးကောက်ပွဲဥပဒေ ပုဒ်မ (၃) တွင် လွှတ်တော်ကို မဲဆန္ဒနယ်မြေများမှ ဤဥပဒေနဲ့အညီ ရွေးကောက်တင်မြှောက်လိုက်သော ကိုယ်စားလှယ်များနှင့်ဖွဲ့စည်းရမည်။ ယင်းပြဌာန်းချက်နဲ့အည်ီ လွှတ်တော် ခေါ်ယူဖွဲ့စည်းခြင်းကို န၀တ က ဆောင်ရွက်ပေးမည်။”
“ယနေ့အခြေအနေတွင် ပြည်သူများက ရွေးကောက်တင်မြှောက်လိုက်သော ကိုယ်စားလှယ်များသည် အနာဂတ်ဒီမိုကရေစီနိုင်ငံတော် ဖွဲ့စည်းပုံအခြေခံဥပဒေကို ရေးဆွဲကြရန် တာဝန်ရှိသည့် ပုဂ္ဂိုလ်များဖြစ်သည်။”
ဒီတော့ ၁/၉၀ရဲ့ ဖော်ပြချက်တွေကိုပဲ စစ်အုပ်စုရဲ့ ကတိစကားတွေလို့ အတိယူပြီး ကြည့်ရအောင်ပါ။
(၉၀) ခုနှစ် ကုန်သွားတယ်။ (၉၁) ဘာမှ မထူးခြားလာဘူး။ ၁၉၉၂။
၁၉၉၂ ခုနှစ် ဧပြီလ (၂၄) ရက်နေ့မှာတော့ စစ်အုပ်စုက ကြေညာချက်တစောင် ထုတ်ပြန်လာတယ်။ ကြေညာချက် အမှတ် ၁၁/၉၂။ ဖွဲ့စည်းပုံ အခြေခံဥပဒေရေးဆွဲရေးအတွက် အခြေခံမူများ ချမှတ်ဖို့ အမျိုးသားညီလာခံတရပ် ကျင်းပမယ်ဆိုတဲ့ အကြောင်းပဲဖြစ်တယ်။ စစ်အုပ်စုက နားရွက်ခတ်လာပါပြီ။
ဒီနေရာမှာ ၁၉၉၁ နိုဝင်ဘာ (၁၈) ရက်နေ့က ကျွန်းချောင်းဓာတ်မြေသြဇာစက်ရုံမှာ အတွင်းရေးမှူး(၁) ပြောခဲ့တဲ့စကားကို ကောက်ပြီးဖော်ပြလိုတယ်။
“… အမျိုးသားညီလာခံခေါ်ယူရေးမှာ နိုင်ငံရေးပါတီတွေ ရွေးကောက်ပွဲအနိုင်ရ ကိုယ်စားလှယ်တွေရဲ့ တာဝန်ဖြစ်တယ်။ န၀တက လိုအပ်တာတွေကိုတော့ ပံ့ပိုးပေးသွားမယ်။”
အဲဒီလိုပြောပြီး (၁၁) လအကြာမှာ ကြေညာချက်တစောင်ထပ်ထုတ်တယ်။ ၁၃/၉၂။ အဲဒီကြေညာချက်အရ ကျင်းပရေးကော်မရှင်တွေ ဖွဲ့တယ်။ ဦးတည်ချက်တွေ ချတယ်။ ကော်မရှင် တဖွဲ့လုံးက စစ်တပ်က ဗိုလ်ချုပ်ကြီးတွေပဲဖြစ်တယ်။ ကော်မရှင်ကပဲ ညီလာခံကိုယ်စားလှယ်တွေကို ရွေးတယ် ခန့်တယ်။ လုပ်ထုံးလုပ်နည်းတွေကို ပြဌာန်းတယ်။ ဦးတည်ချက်က “အနာဂတ်နိုင်ငံတော်ရဲ့ အမျိုးသားနိုင်ငံရေး ဦးဆောင်မှု အခန်းကဏ္ဍမှာ တပ်မတော်က ပါဝင်ရေး”
ပြည်သူ့လွှတ်တော်ကိုယ်စားလှယ်တွေရဲ့ အခန်းကဏ္ဍက ၁၉၉၃ ကနေ (၉၅) အထိ ကျင်းပခဲ့တဲ့ ပထမအကြိမ် အမျိုးသားညီလာခံမှာ (၁၅%) ရှိခဲ့တယ်။ ၂၀၀၃ ခုနှစ် ပြန်စတဲ့ ဒုတိယအကြိမ်မှာတော့ (၁.၂%) ပဲရှိတယ်။
အခြေခံမူချမှတ်တယ်ဆိုတဲ့ ညီလာခံက အသေးစိတ်တွေချလာတယ်။ အပိုဒ်အစား ပုဒ်ထီး ပုဒ်မ ပြောင်း။ ခေါင်းစဉ်ကို “ဖွဲ့စည်းပုံ အခြေခံဥပဒေ” လို့ ပြောင်းလိုက်ရင် ပြီးတဲ့အထိ ဖွဲ့စည်းပုံ အခြေခံ ဥပဒေကို ညီလာခံက ရေးနေတယ်။ “အတည်” လို့ ယူဆထားခဲ့တဲ့ ၁/၉၀ အပိုဒ် (၂၀) ဟာလည်း စစ်အုပ်စုအမျိုးသားညီလာခံ လုပ်ဆောင်မှုတွေကြောင့် ပျက်ခဲ့ရပြန်တယ်။ လွှတ်တော်ကိုယ်စားလှယ် တွေရဲ့ ပါဝင်မှုက လုံးဝမရှိ။ နိုင်ငံရေးပါတီများရဲ့ အခန်းကဏ္ဍက နတ္တိ။ ပိုဆိုးတာက ၁၉၉၆ ဇူလိုင်(၄) ရက်နေ့မှာ အင်အယ်လ်ဒီ ဥက္ကဋ္ဌနဲ့ ဗဟိုအလုပ်မှုဆောင်နှစ်ဦးကို စစ်အုပ်စုက ခေါ်တွေ့ပြီး ပြောခဲ့တာ ပဲဖြစ်တယ်။
“အင်အယ်လ်ဒီက ဖွဲ့စည်းပုံအခြေခံဥပဒေတခု ရေးဆွဲရင် စစ်အုပ်စုနဲ့ စင်ပြိုင်လုပ်တာဖြစ်မယ်။ ရေးဆွဲရင် အင်အယ်လ်ဒီကို မတရားအသင်းကြေညာမယ်။ ရေးလိုရင်တော့ တောထဲမှာသွားရေးပါ။”
ဖွဲ့စည်းပုံအခြေခံဥပဒေအသစ်အတွက် အခြေခံမူတွေ ချမှတ်နေပါတယ်ဆိုတဲ့ အမျိုးသားညီလာခံဟာ ပြီးခဲ့တဲ့ သြဂုတ်လ (၃၁) ရက်နေ့က ပြီးဆုံးသွားခဲ့ပါပြီ။ စစ်အုပ်စုဟာ ပြောင်ပြောင်တင်းတင်းပဲ တိုင်းပြည်ကို လိမ်ညာခဲ့တာပါ။ သူတို့ထုတ်ပြတ်ခဲ့တဲ့ ကြေညာချက် ၁/၉၀ တို့၊ ပြောခဲ့တဲ့စကားတို့တွေ အားလုံးဟာ “မုသား” အဖြစ် ပြီးခဲ့ပါပြီ။
၂၀၀၁ ခုနှစ်လောက်က Happer’s မဂ္ဂဇင်းမှာ ဆောင်းပါးရှင် Christopher Hitchers က အမေရိကန် နိုင်ငံခြားရေးဝန်ကြီးဟောင်း ဟင်နရီကစ်ဆင်းဂျားကို “တော်တဲ့လူလိမ်ဆိုတာ မှတ်ဥာဏ်ကောင်း ကြစမြဲပါ ၊ ကစ်ဆင်းဂျားဟာလည်း အလွန်မှတ်ဥာဏ်ကောင်းပြီး အလွန်တော်တဲ့ လူလိမ်တယောက်ပဲ ဖြစ်ပါတယ်” လို့ ဆိုက်ပရပ်စ် အရေးအခင်းနဲ့ပတ်သတ်ပြီး စွဲချက်တင်ခဲ့ဖူးပါတယ်။
ကျနော်တို့ မြန်မာပြည်က စစ်အုပ်စုကတော့ မှတ်ဥာဏ်နည်းတဲ့လူလိမ်ပါ။ ဘာကြောင့်လဲ ဆိုတော့ စစ်အုပ်စုဟာ ပြောင်ပြောင်တင်းတင်းနဲ့ မျက်နှာပြောင်တိုက်ပြီး လိမ်နေရလို့ပါပဲ။
ကိုးကား …..
- ဗိုလ်ချုပ်မှူးကြီးစောမောင်မှ တိုင်းပြည်သို့ တင်ပြချက် (၂၃.၉.၈၈ နေ့ထုတ် လုပ်သားပြည်သူ့နေ့စဉ်သတင်းစာ)
- ဗိုလ်ချုပ်မှူးကြီးစောမောင်၏ မိန့်ခွန်း (၅.၇.၈၉ နေ့ထုတ် လုပ်သားပြည်သူ့နေ့စဉ်သတင်းစာ)
- (၁၀၄) ကြိမ်မြောက် န၀တ သတင်းစာရှင်းလင်းပွဲ
- အတွင်းရေးမှူး (၁) မှ ကျွန်းချောင်းဓာတ်မြေသြဇာစက်ရုံတွင်ပြောကြားခဲ့သည့်မိန့်ခွန်း (၁၈.၁၁.၉၁ လုပ်သားပြည်သူ့နေ့စဉ်သတင်းစာ)
- ဂန္ဒီခန်းမ ကြေညာစာတမ်း
- န၀တ၏ ကြေညာချက်နှင့် ဥပဒေများ ၁/၉၀၊ ၁၁/၉၂၊ ၁၃/၉၂၊၅/၉၆။
- အင်အယ်လ်ဒီဥက္ကဋ္ဌ ဦးအောင်ရွှေမှ ဗိုလ်ချုပ်မှူးကြီးသန်းရွှေထံသို့ ပေးစာများ (စာအမှတ် – ၀၄၆/စည်း [ငြိမ်း] /၉၆။ စာအမှတ် ၀၈၂/စည်း [ငြိမ်း] /၉၆။ စာအမှတ် -၁၀၃ /စည်း [ငြိမ်း] / ၉၆။
Filed under: ဆောင်းပါး | Leave a comment »
Minyarzar 